S Chochduell

Nit daas, wo diir jetz dänked. Es goot nit um die Sorte Duell, wo me, wie früeijer, enander d Hellebarte oder der Moorggestäärn um d Chürpse gschlaage hed.
S goot um vill fürchterligeri Duell, wo mit Seechtbecki, Schwingbääse, schaarffe Gertel und andere gmeingföörlige Chuchi-Instrumänt umenander gfigureetled wiird. Iich mäin die gaschtronoomisch so wäärtvolle wie leerryyche Chochduell im Fäärnsee. Wo Chöch und settigi, wo s gäärn weere, wie die Halbverruckte mit de verschiidenschte Chuchigräät und Lääbesmittel in de supermodäärnschte Studiochuchene umenandersyyrache.
Doo wiird Hoochalpe-Spinat in südfranzöösischem Meerwasser blanschiert, Eberschnauze zunere Trüffelsou-Baschdeete verchnätted, es wäärde Felchegallebloose mit aabrötledem Schungge gfüllt, grupfti Schneehüener uf chläinschtem Füür im eigene Saft gschmoort, tröchnedi Heugumperfüdlen ufere Soosse vo Schnuderbeeri und Schleedorn serviert und so wytter und so furt.
E Däil vo dene Suppechellenakrobaate wäärde vo mee oder weeniger gschickte Läie bim Schnätzlen und Hacken understützt. Das häisst, die kulinarische Dieffflieger gääben in eerschter Linien achtig, ass ene die äigene Finger nit dur e Fläischwolf wurschtled, ass sii sich d Dööpen an der häisse Pfanne nit verbrennen oder sünscht nöime drunder chömme. Wenn sii denn dä ganzi Kampf gege schliiferigi Karpfe, schlyymigi Schnäggen oder dampfendi Gasserollen überläbt häi, müese sii am Schluss zur Stroof s Gchochten au no brobiere.
Und alles mues imene unghüüren Affezaan goo. Me chunnt chuum nooche mit luege, und scho isch wiider useme gwöönlige Güggel es Mischtchratzerli woorde, zaart wie Anke. D Kunscht isch es, us mögligscht Weenigem in chürzischter Zytt no weeniger z mache.
Derbyy hed Choche doch nüt mit Gschnälligkäit, derfür vill mit Liebi z tue. Schöön süüferlig aabroote, e zümftige Schluck vom Chochwyy für e Choch, denn schöön gattlig lo bröisele, wiider e Schluck vom Wyy, der Deckel vom Düpfi lüpfen und e chlyy schnöiggen – und denn äifach waarte, bis alles lind und fertig isch.

Chürpse – Kopf
süüferlig – behutsam