D Feschtrosette

S Durnfescht häisst Durnfescht, wil am Durnfescht durnt wiird. Sett men ämmel mäine.
Nääbe der sportligen Ertüchtigung git s aber nonen andere groosse Nääbewettkampfblatz, und dää häisst Persönligkäitsentfaltig und Profilnöiroosewytterentwicklig. Oder au umgcheert. Im Organisationskomitee vo somene Fescht git s nämmlig immer e Huffe Hälfer. E Däil mit mee und e Däil mit weeniger Yysatz und Gschick, aber die allermäischte wäi e möögligscht groossi Feschtrosetten am Gwändli, wo se denn am Fescht sälber as spezielli Chrampfchäiben uuszäichned. Die Kämpf um Gröössi und Faarpebracht vo däm dekorative Mäscheli syy legendäär. Aber si dauche chuum äinisch inere Veräinschronik uuf. Emänd drum, wil s äim hindedryy denn fascht sälber e chlyy pyynlig isch. Wäär wäiss.
Item. Die Kämpf fönge scho lang vor em Fescht aa und soorgge mäischtens au noom Fescht no für rooti Chöpf bi alle Bedäiligte.
Es wiird e Feschtrosetteverdäiligskommission bilded, wo in langen Entschäidigsprozäss uuscheesed, wäär weeli und wiene groossi Rosetten überchunnt.
Und was es alls für Rosette git. Doo git s e Rosette für en Ässensbonkontrollöör, für e Schyyssibürschteliverantwortlige, für en eerschten und e zwöite Wyttsprungsandgrueberächeler, und au döört wiird wiider zwüsche sogenannte Links- und Rechtsrächeler unterschiide, für e Hoochsprunglattepolierer, e Magnesiumverantwortlige, für die offizielli Dächlichappeverchöifere, für e Bierfassaastächer und so wytter und so furt.
Es wiird es Feschtrosettereglemänt verfasst, wo ganz genau drinn feschtgläit isch, wäär überhaupt es sones choschtbaars Apzäiche zguet hed. Jeede will natüürlig mitere möögligscht groosse Rosetten an syym Feschtchüttel glänze, und yyfersüchtig wiird druuf gluegt, ass der Kari nit die grösseri hed as der Kurt oder no schlimmer, äini vo der Daameriigi. Derbyy hed d Gröössi vo der Rosette nit immer öppis mit der Läischtig vom Drääger oder der Dräägere z due – mäinti iich! Im Rächne bi de Fortgschrittene häisst das: umgcheert brobortional.
Nääbenyyne: Nit, ass öpper mäint, d Reed syg vom Durnfescht. Z Sissech am Eidgenössische git s für alli Offizielle nummen Uuswyys, wo eerscht no alli glyych uusgseeje. Käini Rosette. Es isch halt nümm wie albe.

uuscheese
– ausknobeln
albe – einst

Dieser Beitrag wurde in Volksstimme veröffentlicht. Ein Lesezeichen auf das Permalink. setzen. Kommentieren oder einen Trackback hinterlassen: Trackback-URL.

Einen Kommentar hinterlassen

Ihre E-Mail wird niemals veröffentlicht oder weitergegeben. Erforderliche Felder sind mit * markiert

*
*

Sie können diese HTML-Tags und -Attribute verwenden <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>