Der Herbschtkataloog

Ooni ass es öpper meerkt, wäärde miir Manne immer wiider an Rand vo der Wältgschicht drängt. Miir wäärde schlicht vergässe, es intressiert sich käi Sou für öis, as weere miir nit d Chroone vo der Schöpfig. Miir finden äigedlig gaar nit statt.
Und iich sääg öich jetz grad, worum das esoo isch – nundefaane.
Der nöi Herbscht- und Winterkataloog vom Chläiderversandhuus XY isch nämmlig in Briefchaschte gflattered. Das häisst, so dick, wie dää jeedes Mool isch, hed en der Pöschtler allwääg eender mit em Huubstapler brocht. 378 Sytte dick isch dä Moodeschungge, mit ville faarpige Fötteli vo mäischtens supermaagere Gumsle, wo in komische Gwänder und no vill komischere Stellige Sytten über Sytten apbildet syy. Für öis Manne hed s in däm überuus wichtige Schungge brezyys uf 34, in Woort vieredryssg, Sytte Blatz.
Für jeedi Gattig vo wyyblige Wääse hed s in däm Kataloog es Blätzli oder zwöi. Hochzyttschläider, grippledi Knickerbocker, Gurritbaadchappe, schlüpfrigi Schlüpfer, Umstandsröck wie Zwöierzält, Baadeschlappen in exklusivschter Schlangelääderuusfüerig, Aschtronautenaazüg (sii gseijen ämmel esoo uus), gringledi Chindersogge, Myyder für gstandeni Frauezimmer… Und alles schöön faarpig und gattlig bräsentiert.
Und denn – ganz hinden im Kataloog, am moodischen Apgrund – hed s non e baar Chüttel us Kunschtfaasere, Hoose mit Umschleeg, lyynigi Hemmli, handgstrickti Wullesogge, uusglyyredi Underhoose mit und ooni Öffnig und sünscht none baar deeguutanti Moodenentglöisige für öis Manne.
Die ständigi Diskriminierig uf e baar weenigi Kataloogsytte wiird vo öis Mannen aber ooni Chlaage hiignoo. Und niemer vo öis chiem uf d Idee, wäge däm es Büüro uufztue, oder wie s hütte modäärn isch, es Mannehuus für gschlaageni Baarchedhoosedrääger oder
e Sälbschthilfegruppe für veräinsaamti Kiltdeckistricker z fordere. Oder emänd es Büüro für d Glyychstellig vo Maa und Frau in Moodekatalöög.
Iich waart scho gspannt uf die nööchschti Früeligsuusgoob in der Hoffnig, ass es denn döört velicht e baar Sytte mee für öis Manne hed und ass öisi moodisch verkümmeredi Seel wiider e chläi chaa uufschnuufe.
Bis denn wünsch iich allne Mannen e straffe Gummizug an de Schyyhoose.

nundefaane
– im Namen Gottes, au nom de Dieu
deeguutanti – abscheuliche

Dieser Beitrag wurde in Volksstimme veröffentlicht. Ein Lesezeichen auf das Permalink. setzen. Kommentieren oder einen Trackback hinterlassen: Trackback-URL.

Einen Kommentar hinterlassen

Ihre E-Mail wird niemals veröffentlicht oder weitergegeben. Erforderliche Felder sind mit * markiert

*
*

Sie können diese HTML-Tags und -Attribute verwenden <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>