Scho vo de Neanderdaaler wäiss me, ass sii s Mammutgottlett, wo sii nit ganz häi mööge fertig ässe, nit äifach in der Hööli häi chönne lo ummeligge. Zu deere Zytt isch s jo dur e Daag soumeessig häiss und dur d Nacht en Affechelti gsii. Doo weer ene bigoscht der aabisse Chnoche no gschmurig worde.
Es hed au no käini Chatze gee, wo in de muffige Höölenen ummetiigert syy und alles underopsi gmacht häi. Es hed höchschtens emool e hungrige Sääbelzaantiiger in d Hööli yynegluured.
Hüt häi mer s natüürlig vill äifacher. Erschtens git s käini Sääbelzaantiiger me und zwöitens – häi miir d Klaarsichtfolie.
E feini Erfindig. Me chaa nämmlig s aagchöite Gnaagi, der halb Schwartemaage oder der aagschnittnig Alpchees ganz äifach früsch bhalte: Me wiggled nämmlig alles schöön gattlig in Klaarsichtfolien yy. Und es goot jo soo äifach: Me ryysst, wenn men nach öppe zää Minute chnüüble der Aafang vo der Folie gfunden und sich an der zaggten Apryyssvoorrichtig nit d Finger bluetig gschnitte hed, es Stück Folien ap. Mäischtens isch denn dä Fätzen aber äntwääder z chlyy oder z grooss.
Me brobierts no äinisch, suecht wiider der Aafang, ryysst, scho lyycht gnäärvt und mit übermenschliger Aasträängig, wiider e Flängge vo der Folie ap. Wil de halt wiene Büffel draa grisse hesch, verryysst d Folien in zwöi Stück.
Jetz chunnt der Momänt, wo duu die eerggschte Flüech muesch underdrücke – wääge de Chinder – und duu zu diir säisch, nundefaane, es chaa doch nit so schweer syy, es Stück Folien apzryysse.
Wenn dii wiider e chlyy berueigt hesch, duesch der Schlachtblaan ändere.
Schöön süüferlig chnüüblisch, jetz öppe scho zum dreiezwänzigschte Mool, am Folienaafang ummen und ziesch langsaam an däm Fötzeli, wo den in müesaamer Chlyyaarped freigläit hesch. Mit em Resultat, ass der wääge der ville Chnüüblerei d Folien in öppe drei unglyychmessigi Flängge verryysst.
De ziesch, was häisst ziesch, de schränzisch wiene Verruckten an der Folien umme, was aber bewürkt, ass di numme no mee in e Döibi yyne stäigerisch und die praktischi Folievorrichtig an d Chuchiwand bänglisch.
In däm äinsaame Momänt, duu und d Folie, chömme der wiider d Neanderdaaler in Sinn und es dunkt dii, ass miir in Däil Sache noonig vill wytter syy as d Uurmensche.
gschmurig – schrumpelig
chnüüble – klauben
