Rund um äim umme wiird wiider wie verruckt grilliert. Ganzi Rinderhäärden und Söiruudel wäärde mit mee oder weeniger Erfolg zu gigantische Mäischterwäärch verbröötled. Unbescholteni Manne, in eermelloosen Underlyybli, verwandle sich zue woore Grilliermonschter. Am Horizont glüeien Oobe für Oobe die unglaubligschte Füürsbrünscht.
Au iich haa deene Düft vomene früsch grillierten Ormalinger Büffel nümm chönne wiiderstoo und haa mer nacheren 48-jöörige grilllose Zytt e Gaasgrill zuedoo. I chumm au scho ganz guet zrächt mit deere raffinierte Technik und haan e groossi Fröid an myym beschäidene Brootrooscht.
Aber aaschyynend haan iich mii z früe gfröit. Grill isch ebe nit äifach Grill. Glyy haan iich gmeerkt, ass es die apsunderligschte Grillfraktione git. D Holzchoolefundamentalischte, d Pfadfinderexischtenzialischte, d Schmineeradikalischte, d Elektrogrillfetischischte, d Vegetarierextremischte und d Füürweer, wo am Schluss der ganz Bräägel mues lösche. D Dischgrill-Waarmduscher chönne mer an deere Stell as unverbesserligi Pseudogriller vergässe.
Iich sääg öich. Doo chrache die verschiidene Grillbürschte-Fronte soumeessig uufenander. D Holzchööleler syy überzügt, ass die richtigi Grillstimmig numme mit glüenige Holzchoolen uufchunnt. D Pfadfinderabdäilig isch der Mäinig, e Wurscht schmeckt numme denn richtig, wenn sii nöimen im Wald überemen offnige Füür bröötled woorden isch. Iich bi fryyli der Mäinig, d Wurscht schmeckt denn guet, wenn gnueg Fläisch und Späck drinn isch.
D Schminee-Aahänger syy äigedlig en Undergruppe vo der Pfadi. Sii syy au dusse, aber wäi sich bim Schwyynsgottlettbrutzle nit umbedingt es füechts Füdle hoole.
Die Fortschrittligschte, sii mäine s ämmel, syy d Elektriker. Sii syy d Schöönwättergriller. Es mues alles schöön suuber und droche syy, nit ass enen äini jättet, wenn sii es füechts Grillkaabel yystecke.
Die äinte syy überzügt, ass bi iirer Technik d Känguruchnüüschyybe saftiger blyybe, bi den andere wiird s nepalesisch Büffelfläisch oder die überchaaredi Chatz vom Noochber zarter.
So hed jeedi Grillfraktion iiri ganz uuräigene Vorstellige, wie men am beschten es schööns Stück Fleisch in e Choolehuffe verwandled. Jeedi vo deene verschiidene Grillrooschtveräinigunge verdäidiged iiri Grill-Wältaaschauig bis uf die letschti Zagge vo der Grillzange.
Iich aber grill still vor mii aane, wil iich wäiss, ass nit die titanlegierte oder termitverschwäisste Syytenööt vom Grillrooscht entschäidend syy. Wichtig isch daas – mäinti iich ämmel – wo uf em Grill lytt.
apsunderlig – absonderlich
fryyli – freilich
