Der Häärdöpfelsalaat

Er isch soo stolz gsii uf sii Häärdöpfelsalaat.
Jeede Moorgge hed er in syym chlyyne Bäizli d Häärdöpfel überdoo und hed se schöön süüferlig weichgchocht. Denn hed er die no waarme Häärdöpfel gschellt und sich derbyy, wie jeedes Mool d Dööpe verbrennt. Denn hed er se, äin um en ander, in glyychmeessigi Schyybe gschnääfled. Häissi Bouillon, woner äxtra gchocht hed, und Essig drüber gleert und die ganzi Sach e gueti Halbstund lo zie.
In der Zwüschezytt hed er Ziibele, Schnittlech und Beeterli ghackt und über die waarme Häärdöpfel gströit, alles mit Mayonnaise vermischt und no mit Salz und Pfäffer apgschmeckt.
Soo, wie me halt e richtige Häärdöpfelsalaat macht.
Das isch soo lang guet gange, bis öisem beduurenswärte Bäizer amene schööne Daag der Läbensmittelinspäkter in d Chuchi gschneit hed. Dää hed daas gmacht, woner aagstellt gsii isch derfür, und hed in alli Eggen und under alli Brätter glüüchted. Hed d Fingerneegel vom Bäizer kontrolliert, öb s emänd schwaarzi Ränder drunder hed. Zum Schluss hed er denn no der Häärdöpfelsalaat under d Lupe gno und dä Salaat bis uf s letscht bitzeli Schellede gnau undersuecht.
Es isch schrecklig gsii. Vill z vill Käim. Äigedlig müesten alli, wo dervoo gässe häi, scho lengschtens s Zyttlig gsäägned haa.
Der Inspäkter mäint: …und denn sicher au ooni Gummihändsche mit de blutte Händ underenand gmacht. Sofort in Chüelruum und überhaupt und sowieso… und wenn doo jeede wetti irgend sone gsundheitsgfäärdendi Zyttbombe under d Lüt bringe.
Gälled. Natüürlig wüsse miir alli, ass nüt Gruusigers git as chalte Häärdöpfelsalaat. Woo s äim bim eerschte Biss der Schmelz vo de Zeen jätted. Wichtig isch aber nit, öb s d Gescht guet finde, wichtig isch, ass der Salaat klinisch teschted und in Oornig isch.
Der Bäizer hed d Wält nümm verstande. Er isch sich voorchoo wie imene Operationssaal. Er hed sich scho gsee, wien er s nööchscht Mool, wenn er wiider Häärdöpfelsalaat macht, miteme Mundschutz, sterile Händschen und eme wysse Chüttel in der Chuchi stoot.
Iich fröi mii jetz scho, wenn s in jeedere Bäiz numme no der glyych standartisiert, aber absolut sterili Schnällhäärdöpfelsalaat git.
Hygienen isch guet, aber gälled, miir wäi s nit überdryybe.

Dööpe – Finger
Schellede – Kartoffelhaut

Dieser Beitrag wurde in Volksstimme veröffentlicht. Ein Lesezeichen auf das Permalink. setzen. Kommentieren oder einen Trackback hinterlassen: Trackback-URL.

Einen Kommentar hinterlassen

Ihre E-Mail wird niemals veröffentlicht oder weitergegeben. Erforderliche Felder sind mit * markiert

*
*

Sie können diese HTML-Tags und -Attribute verwenden <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>