Wie doch d Zytte vergönge. Wenn früeijer d Mueter gsäit hed, legg e Chappen aa, es isch chalt dusse, bisch uusgraschted. Zue sällere Zytt häi numme d Mäitli iiri fyynen Öörli mitere Chopfbedeckig müese schütze.
Und hütte? Joo, doo chunnsch diir mängisch voor, wie imene Winterkuuroort. Die mäischte Jüngling häi irgend e komische Wulletschäppel uf em Chopf. De gseesch die underschiidligschte Kreatione: Sälber gstrickti. Vo der Groosmueter ghöggleti. Vo der Schwöschter gklöppleti. Es Erbstück vom Groosvatter us em Eerschte Wältchrieg. Au die verschiidene, moodische Uusfüerige syy yydrücklig. Doo git s: D Inkachappen us Lamawulle. Uf der Sytten aabe mit lange Schlämpe, wo d Ooren apdecke. D Reggae-Chappe in de typische Landesfaarpe vo Jamaica. Guet gseet s natüürlig uus, wenn de zu deere Chopfbedeckig e zümpftige Joint paffsch.
Der afrikanischi Hirtetschäppel us biologische Hirsestängel gflochte. Ganz sälte gseesch au wiider die berüemt-berüchtigedi Rosche-Staub-Multifunktionschappe. E Zytt lang isch daas Modäll jo numme no vo Bankröiber (miss)bruucht worde. Immer beliebter wiird s Modäll «Auge zue und dure». De nimmsch irgend e Wullechnöiel, drapiersch diir die Sach uf d Chürpse, mögligscht über d Auge. Numme soo gseesch nämmlig huere «cool» uus.
Als beliebts Alternativmodäll wiird im Momänt bi de Birkestocksandaledrääger die griechischi Olivegünner-Dächlichappe us Schoofwulle vo Lesbos ghandled. In paramilitärische Kräis isch grad s schottische Militärbarett us Kiltstoff miteme Munifiisel hindenaabe grooss im Renne.
Als letschte Schrei gülted aber die marrokanischi Berberchappen us dröchnede Gäissemääge. Was es läider noonig git, isch der Sennechäppi-Kult. Aber irgend äinisch chunnt sicher öpper uf d Idee, au daas no as Modegägg z langsiere. Sicherhäitshalber zeerscht emool im Ussland, emänd.
Die schönschti Chappen aber hed wytumme der Schmaalspuur Robi Williams alias Baschi vo Gälterchinde. Bi der grööschte Hitz hed dää um s Verwoorgge d Chappe nit apzooge. Wenn dää nummen emänd nit schone Glatze hed.
Also, liebi Lääserinnen und Lääser, diir müesed euch nit schämme, wenn dir zwüscheduren öppen e Chappen aahäit. Dir sytt «in»!
wytumme – weitherum
um s Verwoorgge – um keinen/jeden Preis
