Der Yychauf

Uufgschlosse, wie miir Mannen emool syy, gönge miir jeede Samschtig braav und oortlig go Kommissioone mache. Also göngen isch e chlyy überdriibe: Miir wäärde vo de Fraue gschickt.
Es isch e ruuchi Wält, das Yychaufe. De muesch dii as Maa gegen en Übermacht vo Huusfraue behaupte.
Scho vorem Yychaufswäägeliparkblatz entstönde die erschte Fysymadänte. Wäärend duu umständlig im Boorpmenee, z underscht im Yychaufsgäärnli nachemen Äifränkler chnüüblisch, wäärde hindedraa scho die Eerschten ungeduldig. Es syy daas
d «Shoppingprofis» – die häi e Chip für s Wäägeli und bruuche drum nid jeedes Mool Münz uusezchnüüble.
De chnoorzisch also das Wäägeli füren und kurvsch uf d Gmüesabdäilig loos. Döört stoot aber mäischtens scho bräitbäinig en Yychaufsgemäinschaft (Frau und Maa) und berooted imene langwyyrigen Evaluationsverfaare, öb Zucchetti oder Auberginen in Ratatouille ghööre. Wenn duu dii denn äntlig zu de Chruttstiil kämpft hesch, hed sich d Ratatouillefraktion grad in däm Momänt entschiide, au settigi z choche. Und scho wüele sii wie die Halbwilden im grüene Chrutt umenander.
E chlyy verstöört chrucklisch wytter und verwütschisch bi de mexikanischen Impeeri grad sone Schlaumäier, wo die baar möltsche Beeri vom äinte zum andere Schääleli wett überebyygele. De luegsch dä Laaferi e chlyy böös aa, und er verschwinded verlääge Richtig Brootabdäilig. Aber die grööschti Uuseforderig bim Yychaufen isch immer no, der Überblick über s Bonus-, Superbonus-, Suppehaafemäärkli- und s Kumulus-Chaartechaos z bhalte. Äinisch git s doo für zää suuber apgschläckti Joghurtdeckeli äis Natüürjoghurt gratis. Oder für äis Kilo Häärdöpfelschellede, wo noonig schimmlig isch und zrugg in Lade bringsch, chunnsch e handsignierte Häärdöpfelscheller vom Colani über. Und glyy überräicht men äim füren apgnaggte Gnaagichnoche, wo de zrugg in d Metzg bringsch, nones Päckli Äärpssuppe. Iich bi gspannt, was as Nööchschts chunnt. Woorschyynlig muesch glyy no d Bostitchchlammere sammle, wo s der an s Seckli vom griibene Chees mache. Und wenn denn zweehundert Stück uf der Sytte hesch, darfsch as Dank irgend nöimen uferen Alp bim Cheese go zueluege.
Iich haa jedefalls am Samschtigmoorgge, bevoor iich ins Doorff gang, immer e chlyyneri Panikattacke, öb i au alli die verschiidene Chaarte bi miir ha. Also dänked draa, liebi Huusfraue: Wenn der am Samschtig amme hilflosi Manne bim Yychaufen aadräffed, häit
e chlyy Verständnis. Es hed jeeden emool unden aagfange.

oortlig – ordentlich
Fysymadänte – Umstände

Dieser Beitrag wurde in Volksstimme veröffentlicht. Ein Lesezeichen auf das Permalink. setzen. Kommentieren oder einen Trackback hinterlassen: Trackback-URL.

Einen Kommentar hinterlassen

Ihre E-Mail wird niemals veröffentlicht oder weitergegeben. Erforderliche Felder sind mit * markiert

*
*

Sie können diese HTML-Tags und -Attribute verwenden <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>