Das syy die würklig druurige Momänt im Lääbe vomene Maa. De bisch im Hallebaad, und um dii umme wimmlet s nummen esoo vo underernäärte, bruunbrennte Sportskanoone. Nyydisch muschterisch die Herkules und muesch der yygestoo, ass duu scho eender wiene vertraschaaggede Schwartemaagen uusgseesch. Zrugg dehäi, fassisch zum iggste Mool der folgeschweer Entschluss: Iich will au sone Wöschbrättbuuch.
De mäldisch di also in somene berüchtigede Hantlestämmschuppen aa. As Eerschts empfoot dii es woolgformts Muskelpakeet mit ebe somene flache Buuch. Iich froog mii immer, wenn iich sonen Adoonis gsee, was chäibs ässe die äigedlig?
Schüüch bringsch duu dii Wunsch aa, de wettisch e baar Kilo apnee. Über s Gsicht vom Folterchnächt huscht es mitläidigs Lächle. Spöötischtens in däm Momänt wäisch, ass duu dyy Ranze, au mit no soo vill Training, nie ganz ewägg bringsch. Wil duu jo aber käis Wäichäi bisch, loosch dii natüürlig vo somene Muskelbrotz nit lo beyydrucke. De strecksch iim die gschwellti Hüenerbruscht entgeege und ziesch der Buuch yy. Der Muskelmaa ignoriert dyys spootbubertäri Imponiergehaabe, nimmt dii bi der Hand und erkläärt diir die verschiidene Folterinschtrumänt. Argwöönisch muschterisch duu die glitzrigen und glänzige Gräät, und es wiird dir scho s eerscht Mool e chlyy gschmuech.
Denn zäigt er diir, wie me richtig an dene Durngräät ummehandiert. Es sell jo käi Moorggs syy, es sell Fröid mache. Fröid mache??!!
Denn chunnt die eerschti Üebigsstund. De hesch di gattlig uusebutzt, de wäisch jo nie, wär den alls triffsch. De foosch süüferlig afo zie, und es beschlyycht di s unguete Gfüül, ass der Voorgänger am Gräät der Arnold Schwarzenegger mues gsii syy. De nimmsch also zümftig Gwicht ewägg, was die gazällehafti Noochberen an der Bäibrässi miteme dräckige Lächle quittiert. De loosch dii aber nit lo aplänken und gisch alles, ämmel fascht alles. Nachere
Stund verloosch mit schmäärzende Musklen und Glänk, wo gyyre, die unwirtligi Geegend und schlyychsch duuch häi. De gosch go duschen und sinksch denn halber oonmächtig ins Bett.
vertraschaagged – zerknittert
gschmuech – unbehaglich
