Waarte, aber nit uf Godot

Natüürlig isch s en alte Huet. Scho bi de Höölebewooner häi d Manne s halb Lääbe mit em Waarten uf d Fraue verbrocht. Anstatt es stattligs Mammut in alli ässbare Stück z verhaue, waarte sii voreme Fäll- oder Chnochelaade. Au hütte waarte miir ändloos uf d Frauen oder Fründyne, und daas in eerschter Linie vor Chläiderlääde. Scho der Entschäid, mit der Frau go yychaufe, züggt vonere gwüsse heroische Gröössi vo öis Manne. Das wiird numme no überdroffe, wenn denn as wandelnde Chläiderständer vo Boutique zu Boutique secklisch.
Vor jeedem Laade, und das öppe 13 Mool, spiilt sich s glyych Prozeedere ap. D Frau verschwinded in der Dieffi vo de Chläiderständer, und duu waartisch emool. Denn waartisch none chlyy und none chlyy. De stoosch vor em Gschäft wienen oschteuropäische Steegyyger und d Füess fönge diir aa yyschloofe. S feelt numme no, ass der äin, wo verbyy lauft, us Erbaarmen es Füfzgi vor d Flosse bängled.
Under dyyne Füess git s langsaam e Duelen im Teer. De chönnsch numme hoffe, ass der Stroossebouer gnueg Fundamänt yygläit hed. Nach öppenere Stund mache sich die eerschten Erschöpfigserschyynige bemeerkbaar. Schnäll wirfsch e Vitamintabletten yy, und der Schwecheaafall goot für e Momänt dure. Verzwyyfled luegsch in Laaden yyne, gseesch aber nummen e Hoorde Wildgwordeni, wo wie verruckt in Bäärgge vo Chläider ummenüele.
De wirsch immer schwecher. D Pryysschilder im Schaufänschter nimmsch numme no as verschwummeni egyptischi Wandmoolerei woor. Zum guete Glück allwääg. Wenn de nämmlig chönntisch lääse, was die Fummel so choschte, würdisch zimmlig sicher ändgültig oonmächtig. Es foot diir der Ruggen aa weedue, und de machsch e baar Lockerigsüebige – mit em Resultat, ass dii en alti Frau bim Vorbyygwaggle frogt, öb den e spootberuefene Breakdancer sygsch.
De wogsch e letschte verzwyyflede Blick in Laade, und vor dyym gäischtigen Aug lauft e gruusige Film ap: Dyys Bankkonto nimmt raasend schnäll ap, und duu gseesch dii scho as bättelaarme Sozialbezüger. Denn der grooss Momänt. Dyy gliebti Frau chunnt doch no us der Chauffhallen uuse. Mit leerem Blick und deschperatem Doonfall säit sii daas, wo der nach däm lange Waarte no der Räschte git: Iich haa nüt gfunde!

Flosse – Füsse
ummenüele – rumwühlen

Dieser Beitrag wurde in Volksstimme veröffentlicht. Ein Lesezeichen auf das Permalink. setzen. Kommentieren oder einen Trackback hinterlassen: Trackback-URL.

Einen Kommentar hinterlassen

Ihre E-Mail wird niemals veröffentlicht oder weitergegeben. Erforderliche Felder sind mit * markiert

*
*

Sie können diese HTML-Tags und -Attribute verwenden <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>