Wenn Manne choche

Es git immer mee Manne, wo äntlig wäi wüsse, wie me richtig in der Chuchi ummefuerwäärched. Für daas uusezfinde, gründe sii denn e Veräinigung mit irgendeme gsuecht originelle, gaschtronoomisch aber villversprächende Naame.
In däm Chochklub verwandle sich denn die Raviolibüchsenöffner noodisnoo in Flambiermonschter. Natüürlig git me sich in sonere Titanpfanneveräinigung nit mit so banale Sache wie Beeterlihacke, Salaatwäsche oder sünscht enere mindere Chuchiaarped ap. Die überloot me – wie sich das jo bewäärt hed – groosszügig de Fraue dehäi am Häärd. Es wiird grööbers Gschütz uufgfaare. Numme s Beschten isch guet gnueg.
Es foot bim Meeresgedier aa. Sämtligi Fischerboot im Atlantik göngen uf d Suechi nach em letschten atlantische Blauschuppemeerwolf. Numme vo däm sältene Fisch chaa men es gattligs Carpaccio aanezaubere. Bi de Chruschtedier chunnt numme der gschlächtsloosi Äizangehummer us em lauwaarme Brackwasser voor Norwägen in Froog. Die süüferlig gschwellti Gryyffzange vom hinderlischtig apgmoorggste Hummer wiird denn mit der raue Schwanzflosse vomene Finnwaal gfüllt – glaub iich ämmel. S Schwyynig chunnt vo Söi, wo juchzend in s Schlachthuus yyne-gschwäbt syy. Us de Voorderzeeche git s es Ragout. Wichtig bi däm Gricht isch, ass d Zeecheneegel richtig gschnitte syy. Es git
bekanntlig spezielli Kürs in Japan, wo me nääben em richtigen Entfäärne vo der Gallebloose bim Fugufisch au s Apgnäggle vo Söilizeecheneegeli chaa leere.
S Salz chunnt jo nöischtens vom Himalaya, und die grüene Pfäfferchörner döörffe numme bi Vollmoond gunne wäärde. Bi de Frücht gilt s Motto: Wie wytter ewägg, umso besser. Nit hiesigi Chiirssi, Chrüüseli oder Rhebarbere. Näi, Cranberrys us Kanada, Pitahayas vo der nepalesische Hoocheebeni, Tamarillos us de Mangrovesümpf vo Weschtbengaalen und Ramboutan us em Tämpelbezirk vom Taj Mahal.
Soo gnäggle, schnyyde, sotieren und bräägle die Manne uf höchschtem Nivoo. Richtig schlimm wiird s aber eerscht, wenn die zuekümftige Scheffchöch s Gleerti wäi dehäi aawäände. Schöön uufgruumti Chuchene verwandle sich in chaotischi Sondermülldeponie. D Chinder wäärden in Luftschutzchäller evakuiert. D Huusdier vergraabe sich im Gaarten us luuter Angscht, zumene exotische Gricht verwurschtled z wäärde. Und d Frauen überlääbe die Zytt numme mit e Huffe Valium. Fraue, blyybed stark. Diir bruuched die Chuchi jo für e Räscht vom Joor wiider.

gnäggle – umständlich schneiden
bräägle – brutzeln

Dieser Beitrag wurde in Volksstimme veröffentlicht. Ein Lesezeichen auf das Permalink. setzen. Kommentieren oder einen Trackback hinterlassen: Trackback-URL.

Einen Kommentar hinterlassen

Ihre E-Mail wird niemals veröffentlicht oder weitergegeben. Erforderliche Felder sind mit * markiert

*
*

Sie können diese HTML-Tags und -Attribute verwenden <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>