Äinisch im Joor macht sich myy Frau mit e baar Fründynen uuf, Lyyb und Seel wiider hübscheli aanezbüschele. Für äinisch käi Hektik und käi Gstürm. Die modäärni Frau säit däm «go wellnesse».
E chlyy Gstürm git s denn aber scho. Nämmlig wääge der Uuswaal vo de verschiidene Chläidigsstück. Was nimmt Frau zum «Wellnesse» mit? D Manne wüsse, was iich mäin. Iich schlyych in deere hektische Zytt dehäi de Wänd noo und brobier mit e baar guet gmäinte Tenüvoorschleeg d Laag z entscheerffe. S Ganz änded denn aber wie immer: Z vill Gepäck mit de falsche Chläider.
Äinewääg. Wenn der Schofföör denn alli Kuffere (e riisige Bäärgg) im Autibus versorggt hed, goot s inere gmüetlige Faart Richtig Ööschtryych. In es stattligs Hotel nöimen in der unberüerte Natuur.
Bi der Aakumft git s zeerscht e Willkommensschluck «Prosecco», was mii e chlyy verwundered. E häisse Bruschttee würd doch deenen erhooligssüchtige Fraue besser due.
Denn chunnt en eerschti, groossi Uuseforderig uf d Fraue zue. S Versoorgge vo de ville Chläider in de Hotelchäschte. Äntwääder passe d Schublaade nit zu de Chläider oder d Chläider nit zu de Schublaade. Erschöpft vo deren eerschten Aasträngig schleppe sich d Fraue denn zum ryychhaltige Chuechebuffet. Denn goot s zrugg ins Zimmer, wo sii sich imenen ändloosen Evaluationsverfaare für e Fummel für s Nachtässe müesen entschäide. Nach em 7-Gang-Menü und eme Verryysserli an der Hotelbaar sinke d Frauen erschöpft in die uufbluuschterede Duunedeckene.
Am nööchschte Daag goot s denn zgrächtlige loos. Uf die renovationsbedürftige Fraue waarted es uusdüftleds Schöönhäitsprogramm. En ööschtryychischen Adoonis schliirgged en indischi Kurkuma-Salbi uf d Rügge vo de Fraue. E Miniaturuusgoob vom Arnold Schwarzenegger maltretiert iine die hinderschti und letschti Füdlebackemuskle. In der Chrüttersauna schwitze sii s letschte Bröösmeli vo der geschtrige Sacherdorten uuse. Nach der «Abhyanga-Behandlig» – säit myy Frau – chiem sii sich amme voor wienen egyptischi Mumie.
So goot daas föif Daag lang. Doo isch e Galeere diräkt es Erhooligshäim dergeege.
Iich mag dää Erhooligsuurlaub myynere Frau aber vo Häärze gönne, wil i wäiss: E Fraueriigi goot furt, und e baar Duusig Franke spööter chunnt e Mäitliriigi zrugg.
Schofföör – Chauffeur
uufbluuschtered – aufgeblasen
