Grossi Ufreegig. D Chüe hei blaui Lälli und gäifere zum Muul uus.
Me chönnt au meine.
Dir settet emool myy Lälli gsee, wenn ich mit em Welo über e Hauestei chniemp.
Au gäifere isch nütt Nöis.
Wenn de glääsen hesch, was d Politiker im Baselbiet nach de Waale, enand alles an Chopf gworfe hei. De bisch dr vorchoo, wie im ene Stall voller Hornochse. Dr Gäifer isch chruusdick dr Schoorgraaben abgloffe.
Nit jede gschwullene Lälli chunnt halt vo dr Blauzungechranket.
Aber löie mir das. Luege mir die Sach doch vo dr gattlige Sytten aa.
Wenn des nächschtmool aadrunke (blau) mit em Chaaren underwäägs bisch und vom ene Tschugger aaghalte wirsch, strecksch im eifach dr Lälli uusen und seisch, de heigsch d Blauzungechranket. Au für d Beizer duet sich e nöie Määrt uf. Statt Forelle blau chönne die jetz Rindszunge blau uf d Spyyscharte nee.
E Guete zääme.
gäifere = geifern
chniempe = schwerfällig fahren
chruusdick = zähflüssig
