Joo, es wiird immer no ghüüroote.
Numme, was früeijer öppen e chlyy Schwiirigkäite gmacht hed, nämmlig die richtig Uusstüür z bsoorgge, isch hütte nümme sones Probleem. Weeli Brut will scho no Baarched-Lyyndüecher, es gstickts Fürduech oder es Borzelaangschiirr mit 44 verschiidene Däil. Es isch in der hüttige Zytt emänd au besser, ass me zümftig hiirnt, was men in d Ee will yybringe. Me wäiss jo schlussemänd nit, wie lang die ganzi Sach hebt.
Hüt macht de Hochzyyter öppis ganz anders Moläschte. Bis nämmlig allnen Ämter und Beamten erkläärt hesch, ass de käi wältwyt gsuechte Massemörder bisch, hesch der Gluscht uf s Hüüroote scho fascht wiider verloore. Es isch scho unglaublig, vor wäm und wie mängisch de muesch d Hoosen aabeloo und dyys Innerschte nach uuse cheere. E Kolleeg hed gmäint, me chömm sich voor wienen Yyglochten uf Guantánamo.
S Unhäil foot denn so richtig aa, wenn de brieflig uf s Amt uufbotte wirsch. Der Daag und die gnaui Zytt syy voorgee. Alles ooni Wiiderreed. Nit ass doo no äin chunnt und öppis uusehöischt. Das weer emänd!
Ineren Einzelabfertigung, aso ooni dyy Zuekümpftigi, muesch Reed und Antwoort stoo. Weeli Religion? Überhaupt e Religion? Wenn joo, die richtigi? Isch der schon emool der Chlütter uusgange? Bisch irgend äinisch bedriibe worde? Hesch offeni Bäi? Wenn näi, worum nit? Hed dyy Groosvatter schon emool e Darmverwigglig ghaa? Hesch früeijer emool dyys Döffli frisiert? Bisch bevogted? Schloosch gärn dryy? Zaalsch immer schöön braav d Stüüre? Hesch schon emool es Wello gchlaut und in Bach gschosse?
Numme nääbenyyne, wääge Wello und soo. Die, wo z Sissech d Wello in d Underfüerig bängled häi, chaa me jo läider nit befrooge. Eerschtens wäi die nit hüüroote, und zwöitens hed me se nit, oder besser gsäit noonig, verwütscht. Aber löie mer daas.
Die glyychi Befroogig, wo der Brüterich hed müesen über sich lo ergoo, git s denn no äinisch zääme mit der Zuekümpftige.
Der ganz Bättel aso no äinisch vo voorne. Woorschyynlig will der Beamti luege, öb de voorhäär e Brunz verzellt hesch! So langsaam foosch duu dii afo frooge, öb daas mit der Hüürooterei ächt e gschyydi Sach isch. De dänksch so für dii, hüürooten isch doch öppis Fyyrligs und nit sone chnochedrocheni Sach. Aber es mues halt alles syy Oornig haa – bi öis. Oder ämmel fascht alles!
S Baar isch in der Zwüschezytt glücklig verhüürooted und immer no zääme. S Hochzyttsfescht hed e Gattig gmacht. D Gschänk, wo sii überchoo häi, syy brezyys esoo gsii, wie sich s die zwöi gwünscht häi. Soo lääbe die zwöi friidlig zäämen und häi s schöön midenand.
Nummen öppe zwüschedure dänkt der Brüterich draa zrugg, dur waas für e Beamtemüli äär hed müesse. Derbyy hed er doch äigedlig numme welle hüüroote.
Moläschte – Schwierigkeiten
bevogted – bevormundet
