Duurehächle

Alli maches und niem wäiss so richtig, wies goot.
Drum doo dr Versuech voneren Erkläärig, wie men e richtigi Hächleden aagattiged. Nit son en alldäägligi Kaffichränzlihächlede. Näi. Es goot ums Duurehächlen uf höchem Niwoo. Aso Duurehächlen in Volländig.
Grundsätzlich underschäidet me jo zwüsche dr wyyblige Häächlede, eender us em Buuch uuse, und der männlige Hächlede, wo eender gäischtryych derhäär chunnt. In öisem Fall wäi mir die männligi Hächleden e chlyy gnööier aaluege.

D Mitspiiler

Maa 1: En eehemoolige Bobfaarer us Eptige. Hed scho vill erläbt und kenn fascht e Jeedi. Maa 2: Dää Ladäärnedrääger us Zunzge. As Zunzger isch er gwoont, uszdäile, aber au yyzstecke. 3: Dr Jung voneren ehemoolige Sissecher Metzgerdünaschtie. Der Rüeigscht vo dene drei. Er wiiderhoolt amme daas, wo der Maa 1 nit verstoot. Schtatischt: Dr Schryyberling. Er chunnt amme fascht nit nooche mit zueloose.

D Bühni

Es hiesigs Kaffi mitere grosse Glaasschyybe. Wichti isch doo, as me guet cha uuseluege, aber vo usse nit yynegseet. Me sett für d Lüt, wo me duurehächled, unsichtbaar syy. Am beschten isch der Disch äis bi der Düre. Soo gseet men am beschte, wär as yynechunnt und wär mit wäm wiider uusegoot. Ganz schlächt isch e Disch im hindere Däil vom Kaffi. Me muess denn nämmlig allewyyl von hindefüere spanyyfle und ständig dr Chopf hii und häär dräie.

Der Daag und d Zyyt

Am beschten amene Samschtigmoorgge, so um die Zääni umme. Denn heds am mäischte Lüt im Dorf und es schwanzen e Huffe vor dr groosse Schyybe duure. Schlächt ischs Aahocke, wenn d Sunne dieff stoot. Denn chunnts gärn zue Verwächslige. Umms Ummeluege hed men denn as Hächler d Kontrolle verloore.

D Uuffüerig

Jetz zäigt sich, wär under dr Wuche d Ooren und d Augen offe ghaa hed. Wär doo und dört öbbis ufgschnappt hed oder – no besser -, ganz süüferlig es Grücht gströit hed. Schampaar wichtig isch au, as me Zäämehääng nit us den Auge verliert. Nit as me no öbbis duuränander bringt. Voorberäitig isch alles!
Das isch öbbe d Grunduusrüschtig vomene halbwägs erfolgryyche Duurehächler. Denn cha me loos loo mit hächle.
Jeede und jeedi wird duuregnoo. Die äint, wo schwanger isch. Der äint, won e nöi Fryyse hed – syys ächtig richtigi Hoor oder doch eender e Beerügge. Goot dää jetz mit deere. Worum goot däine nümm mit diisere. Hed dä scho wiider es nöis Auti. Wo hed diisi, wo so ufdaggled derhäär chunnt, numme s Gäld häär,
Soo goot daas dr halb Moorgge. Alles wird duuregnoo. Es wird dischgeriert, barliert und gifteled, as e woori Fröid isch. Eben e Hächlede, wie syy im Buech stoot und daas Samschtig für Samschtig.

Nääbenyyne: Doo non e Froog vo de drei Hächelspezialischte an Scheff vom Kaffi. Müesse denn die bordooroote Umhäng umsverwoorgge an der groosse Schyybe bambele? Sie verspeere nämmlig soumeessig d Sicht uf s Wäsentlige. Uff d Strooss nämlig!
Merci.

Dieser Beitrag wurde in Volksstimme veröffentlicht. Ein Lesezeichen auf das Permalink. setzen. Kommentieren oder einen Trackback hinterlassen: Trackback-URL.

Einen Kommentar hinterlassen

Ihre E-Mail wird niemals veröffentlicht oder weitergegeben. Erforderliche Felder sind mit * markiert

*
*

Sie können diese HTML-Tags und -Attribute verwenden <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>