Wie häi mir amme glacht, wenn dr Buur vom Chäärnelhoof mit de Gummistiifel ins Dorf choo isch. Dräckig syy die Stiifel amme gsii, as äim richtig gruused hed. Die häi usgsee, wie wenn dä Buur diräkt duur e Schoorgraabe gschuened weeri.
An daas han ich müesse dänke, won ich do letschti in dr Stadt gsii bii und de Frauen uf d Füess gluegd haa. Die mäischte häi nämmlig au Stiifel aaghaa. Näi. Chuemischt heds käine draaghaa. Weeder an de Fraue, no an de Stiifel.
Au Gummistiifel hed e käini dräit. Stiifel halt, wo soumeessig choschper usgsee häi. D Fraue häi in deeren Ufmachig e Gattig gmacht und syy ummegstälzd wie Pfaue.
Und ich sääg öich, ich ha allergattig verruckti Sache gsee. Fischerstiifel. Stiifel, wie se «Die drei Musketiere» dräit häi. Stiifel mit hööchen Absätz und deere, wo schreeg aabetschalped gsii syy. Aber die mäischte häi Rytterstiifel aaghaa, as öbb syy graad nöime vonere Springkonkurränz cheemte. Ich froog mii jetz numme, wo nundefaane häi die alli iiri Rösser aabunde ghaa?
choschper = kostbar
ummegstälzd = herumstolziert
