Oobe linggs

Mit Gweer, Schiessdäschen und e huffen andere wichtige Sache, wos schyyns zum Schiesse bruucht, bin iich do letschti underwäggs gsii. Guet. Nit iich han es Gweer byy mir ghaa. Daas weeri sicher lätz uusechoo. Iich haa äin byy mir ghaa, wo soo z sääge mit Schwarzpulver uufzoogen worden isch. Iich haa nämmlig zääme mit em Bombe Gysi dörfe go schiesse. Und die, wo dr Bombe Gysi kenne, wüsse, as daas e soumeessig groossi Eer isch. Gschosse hed natüürlig nummen dr Gysi. Iich haa mer in deere Zytt d Oore zueghebt. Aber fönge miir vo voornen aa.
Wo mir bim Schiessblatz aachoo syy, syy schon e huffe Mannen und e baar Frauen in blaarige Veräinstschööpen und apsunderlige Tschäppel ummegschuened. Au dr Gysi hed son e Tschoopen aaghaa, mit em Naame vo syym Schützerveräin hindedruff. Iich find daas e gueti Sach, wenn jeede Schütz aagschriiben isch. Denn wäiss me nämmlig, won er aane ghöört, wenn er sich emool setti verlaufe. Denn hed dr Gysi e groossi Däschen uus em Auti uusglaade. Zerscht han iich dänkt, dä isch sicher verchoo. Dä will gar nit numme go schiesse. Dä will sicher e dreiwüchigi Schiffsffaart mache. «Dumms chäibe Züg», sänkled mii dr Gysi. In deere Däsche häigs alles Sache, wo me zum Schiesse bruuchi. E Schiessbrülle, e Schiesschüttel, e Tschäppel geege d Sunnen und süscht non e baar Sache, won iich nit verstande haa, für waas die brucht. S Gweer isch nit in der Däsche gsii. Daas isch imene äxtraanige Fuetteraal yypackt gsii und dr Gysi hed daas Brunkstück au ganz süüferlig uus em Kofferruum gnoo. Fascht wien es früschgebornigs Buschi. In däm Momänt, dr Gysi und s Gweer, han iich in syynen Auge s erscht Mool es Lüüchte gsee. Druufaabe syy mir gos Standblatt lööse. Aso iich haa äimool mee numme Baanhoof verstande. Wievill Schüss, in weeler Zytt uf weeli Schyybe. Soumeessig schwiirig z verstoo. Aber dr Gysi wird scho wüsse, won er mues aaneschiesse, han iich dänkt. Denn hed er d Schiessdäschen uufgmacht und sich afoo aalegge. E gstaablige Schiesstschoope, d Dächlichappe mit Syttedächli, Ooreschützer und e Schiessbrülle, won ich s Gfüel ghaa haa, die syygi e chlyy verbooge. In deere Monduur und natüürlig mit em Gweer isch er in Schiessstand yynegwaggled. Uusgsse hed daas, wien e Pinguin mit yygwachsene Zeecheneegel. Dinne hed er em Warner s Standblatt apgee. Noomene Zyttli hed äin brüelt: «Gysi, du bisch dr Neechscht. De chönnsch aaneligge». Noo villem Ranggen und Gruchsen isch er denn esoo glääge, as er guet an d Schyybe füre gsee hed. Won er s Programm duure ghaa hed und wiider uuf de Bäi gsii isch, han iich iin gfrogt, wies gange syyg: «Joo», hed er gmäint. «Daas isch jetz für äinisch käi zeeche Stand gsii. Guet. S äint isch e höchen Achter oobe linggs gsii. Aber won iich gschoobe ghaa haa, isch s doch no guet uusechoo». Ahaa, han iich gsäit und natüürlig wiider nüt verstande.
Noo deeren Aasträngig häi mir zäämen es Bier drunken und e Wurscht gässe – wie sichs halt ghöört.
Nääbenyyne: Dr Gysi hed sälbverständlig dr Chranz gmacht und as Bryys e zääfränkigi Chranzcharten überchoo. Iich maag iim die gönne. Er hed nämmlig erscht öbbe zweeduusig deere Charte dehäi.

Dieser Beitrag wurde in Volksstimme veröffentlicht. Ein Lesezeichen auf das Permalink. setzen. Kommentieren oder einen Trackback hinterlassen: Trackback-URL.

Einen Kommentar hinterlassen

Ihre E-Mail wird niemals veröffentlicht oder weitergegeben. Erforderliche Felder sind mit * markiert

*
*

Sie können diese HTML-Tags und -Attribute verwenden <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>