S Dach apdecke

… «und zletschtemänd no s Huus apdecke». Dää Spruch vom Hutzgüri chunnt miir in Sinn, wenn iich ans hiinig Kunschtidach dänk. Für die, wos immer noonig sette wüsse: S Hutzgüri isch e Häischefigur, wo z Sissech, dört s erscht Mool im Johr 1599, und z Rotheflue im Züüg ummesyyrachet. Macht me nit daas, waas s Unghüür will, so deckts äim ebe s Dach ap. Aber woorschyynlig mues me die, wo für s scheppsen und löchrige Kunschti-Dach verantwortlig syy, nöimen anders go sueche – ämmel nid im Mittelalter.

Wo sy jetz aber die, wo Joo gsäit häi zu däm Dach, wo jetz ewägg mues? Richtig! Niene. S isch wie allewyyl: Tschuld syy immer die anderen oder halt denn eehemooligi Gmäinipolitiker. Daas hed au dää gsäit, wo s Dach boue hed. Jetz wäiss men ämmel emool, wär nit tschuld isch. Hinder de Büsch fürechoo syy aber die, wo daas mit em Kunschtidach scho immer gwüsst häi. Alles Fachlüüt, wo sich beschtens mit Schimmel, Bälken und «Statik» uuskenne. Loosisch e chlyy im Dorf umme, hed jeeden e gschyyde Voorschlaag – aber jeede halt en andere. Numme, hindedryy wäiss mes halt immer besser, oder wie der Jeeger säit: «Hätt der Hund nit gsch…, hätt er der Haas verwütscht».

Joo, s heb scho der äint oder ander gee, wo der doomoolig Gmäindroot druf hiigwiise häig, ass öbbis mit däm Dach nit stimmi. Au Brief syy gschriibe worde. Denn gits deere, wo sääge, iine syyg vom Gmäindroot, wo sälbets Mool s Sääge ghaa häig, däilwyys schuurig d Hüener yydoo worde: «Jetz häit dir doch es Dach, wo diir häit welle, jetz döiet doch nit so soublööd».

Numme, alli die, wos scho immer gwüsst häi, nütze jetz de Schruubedämpferli–Virtuoose vom EHC Zunzge-Sissech nüt – die wäi nämmlig schlyyfschüele, ooni ass iinen e Diilen uf e Chopf gheit. Drum isch au dä Voorschlaag vome ganz Gschyyde nit würklig bruuchbaar, wiider wie früener z Zunzge hinder em Schuelhuus Yys z mache. Aber jetz macht me den Yyshockeyaaner jo es nöis Yysfääld und esoo chönne sii wiider – wie gwoont – dehäi verliere. Au d «Curling»-Spiiler chönnen iiri Stäi wiider fürenee, wo sii scho uf em Eschtrig versorgt häi, und d Leerer müese nümm verzwyyfle, waas sii mit iire Schüeler mache, wil sii nümm mit enen uf d Kunschti häi chönne.

Joo, zu däm nöien Yysfäld hed miir au no äine s Härz uusgschütted: Iim düeig die schööni Matte läid, wo jetz, nummen ass e baar für zwee, drei Mööned chönnen im Züüg ummekurfe, ummepflüegd wird.

A propoo Härz uusschütte: Es git jo bi däm ganze Kunschti-Ungfell au no deere, wo men im Radio, in der Zyttig und am Färnsee dur e Gaggo zooge hed und iine d Schuld in d Schue schiebt. Daas sie die, wo öbbis z sääge hätte, wenn sii denn dörfte. Aber statt daas z sääge, wo sii wüsse, laufe sii mit emene Muschchopf durs Dorf.

IIch sääg numme: Der neecher Hornig isch wiider s Hutzgüri underwäggs. Und so weers allwäg guet, me würd mit däm Unghüür gattlig syy, nit ass no nöimen es Dach apdeckt wird.

Dieser Beitrag wurde in Volksstimme veröffentlicht. Ein Lesezeichen auf das Permalink. setzen. Kommentieren oder einen Trackback hinterlassen: Trackback-URL.

Einen Kommentar hinterlassen

Ihre E-Mail wird niemals veröffentlicht oder weitergegeben. Erforderliche Felder sind mit * markiert

*
*

Sie können diese HTML-Tags und -Attribute verwenden <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>