Jetz hets aber der eehemoolig Breesi vo der Baaselbieter SVP de Stedter gee. Imene Gaschtbyydraag in der «baz» isch er deene in der Stadt, wie mes vomene Rampass gwoond isch, zümftig an Chaare gfaare. Er hed sich drüber ufgreggt, as men in der Stadt nümm sicher syygi. As allbott nöimen e Ussländer luuri, wo äim welli uf e Ranze gee. Do blyybi er lieber z Gälterchinden und schrybt, as au em letschte Bebbi klar isch: «Mir si und bliibe Baselbieter!» Jetz bin iich e chly underopsi. Iich bii nämmlig au e Baaselbieter. Numme würd iich schryybe: «Miir sy und blyybe Baaselbieter!» Esoo wers halt e chlyy nöcher bii öiser Mundart. Aber wär wäiss, velicht hed de «Slogan» en Ussländer gschriibe. Äin, wo gar nit wäiss, wie me richtig Ooberbaaselbieter-Mundart schrybt!
Rampass = Übername der Städter für einen groben Mann aus dem Oberbaselbiet
allbott = immer wieder
