Wenn d Späiche glüeie

So drei Wuche vor der Wienecht ischs an der Zytt, d Woored ans Liecht z loo. So chan iich mii berueigt an d Änisbröötli und s Rollschinggli machen und mues käis schlächts Gwüsse haa.
Also, das isch esoo: Schon e mänggs Joor gang iich mit em Walti go Wello faare. Halt. Das isch scho mol numme die halbi Woored. Äigedlig goot är mit miir go faare, und ich fluech hindedryy. Das mit em Hinderdryychniempe hed aber au syni Voordäil. Der Walti isch nämmlig zwölf Joor elter as iich, gseet aber öbbe zwölf Joor jünger uus. Under anderem hed er der chlyyner Ranze, käi Bart und no vill mee Hoor as iich. Und s Wichtigscht: Er gseet in der Wello-Uusrüschtig nit uus, wien e Bluetwurscht uf vier Reeder.
Wenn miir amme nöimen e geeche Hübel duruufbärze, mäine d Lüt, wo öis zwee gseie, ass de alt Maa wo hindedryy chunnt au no soumeessig guet zwääg isch, ass er däm junge Schnöösel, wo voorewägg isch, fascht noochechunnt. Soo gsee isch ölter schyyne nit immer e Noochdäil.
Aber jetz will iich wie gsäit mit der ganze Woored uuse. E Woored, won em Walti velicht nit gfallt, aber iich cha nümmen esoo wytter lääbe, mit soneme schlächte Gfüel under em Wello-Lyybli.
Es isch nämmlig alles ganz anderscht. Äigedlig chönnt iich vill schnäller Wello faare, wenn iich wett. Nummen iich darf nit, wil iich vo der Pro Senectute aagstellt bii. E gueti Sach. Iich ha nämmlig d Uufgoob – das numme nääbenyyne – zumene Hungerloon, wo nit emoll längt für d Luft in de Pnöö z zaale – mit em Walti uf em Drooteesel uuszfaare, ooni ass sy Psychen e z groosse Schade nimmt.
Wichtig bii denen Uusfaarten isch jetz, ass men em öltere Gspöönli s Gfüel git, er syg gschnäller und me chiem numme mit vill Müei hindenooche. Doo derbyy mues me gschickt voorgoo, ass är, wo voorewägg isch, nit merkt, ass men äigedlig vill gschnäller isch und me duraane mues uufbasse, ass men en nit überhoolt.
IIch ha dooderfür e baar gueti Maschen uf Laager, won iich em Walti s Gfüel gib, er syyg wellotechnisch gsee e chlyyne Pantani – numme mit mee Hoor. Äi Drick isch, ass iich nach e baar Kyylomeeter e Schnützpause mach. Derbyy schnütz iich so fescht in Schnuuderlumpe, ass der Walti mäint iich syyg am apsäärbblen und d Wildsöi wie Überegschnappti us em Underholz seckle.
Es anders Mool düüsch iich e Defekt am Wello voor. Wil der Walti wäiss, ass iich nit chan e Chrüz- vonere Schlitzschruuben underschäide, stygt er sofoort vom Göppel und chunnt cho luege, was hii isch. Mäischtens ischs nummen e Chläinigkäit, aber der Walti cha bii somene Boxehalt sy technischi Überläägehäit uusspiile und mag soo nochhäär au wiider vill besser opsifaare.
Soo Walti, jetz ischs dusse. Es hed mii uf mängere Faart beschäftiged, won iich diir hindedryy gfaare bii und dii nit ha dörfen überhoole. IIch versprich diir, ass iich au im nöie Joor schöön gattlig hindenooche faar. Aber du wäischs jo, au wenn iich no wett, chönnt iich dii nid überhoole.

Dieser Beitrag wurde in Volksstimme veröffentlicht. Ein Lesezeichen auf das Permalink. setzen. Kommentieren oder einen Trackback hinterlassen: Trackback-URL.

Einen Kommentar hinterlassen

Ihre E-Mail wird niemals veröffentlicht oder weitergegeben. Erforderliche Felder sind mit * markiert

*
*

Sie können diese HTML-Tags und -Attribute verwenden <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>