Über alles wird brichtet. Wenn dä mit der Schmalzwälle, wo z Amerika säit, wos duure goht, wiider äinisch en apsunderligi Mäldig uuseloot. Wenn z Süd-Amerika äänen under emene Huuffe Stäi es Chochrezäpt fürechunnt, wo d Inka beschryybe, wie men es Meersöili am beschte grilliert.
Nummen öbbis goht in de ville Noochrichten under: d Zuggetti-Fluet. In de Gaartebettli wuecheren undurchdringligi Zuggettiwälder, wo me sich numme mit ere Machete cha duureschloo. Zum Äärnte vo dene riisige grüenen Ungetüüm bruuchts e Bagger oder e Kraan. Doo längen au die ussländischen Äärntehälfer nümme, wo bi de sträng patriotische Buure d Chiirsi günne, d Druube lääsen oder d Härtöpfel uusmache.
Jeede Daag stoht öbber vor der Dür und hed Zuggetti fäil. Wil de jon en aaständige Mensch bisch, säisch natüürli nie näi. Denn nimmsch das Gmües und bygschs zue den andere 372 meh oder minder groosse Zuggetti. Für das hesch äxtra im Luftschutzchäller s Fäldbett, d Büchseravioli und Stalder-Schoggigreemen entsoorggt und e klimatisierti Zuggetti-Ufbewaarigs-Aalag yygrichted.
Zuedäm bisch allewyyl in der Chuchi und machsch Zuggetti süess-suur yy. Wil dä Bäärgg nie apnimmt, bachsch Wäijen und Chüeche. Chochsch chübelwyys Ratatouille, gfüllti Zuggetti oder Zuggetti-Lasagne. Machsch Zuggetti-Salat, bis as der das Grüenfuetter zum Hals us hangt. Dröchnisch Zuggetti-Chips und duesch Suppen über, wo de denn muesch yygfriere, ass du dii au no im Winter chönnsch fröie, wenns scho lang käini Zuggetti me git.
Us em Seeland, wo normalerwyys numme Chaabis aapflanzt wird, hed me vomene Gärtner chönne lääse, wo nümmen us em Zuggettibletter-Dickicht uusegfunde häigi. Oder vo Füüroobe-Gärtner, wo under monschtröse Zuggetti begraabe worde syy und denn vom Zyvyylschutz und der REGA häi müese gretted wäärde. S goht allwääg nümm lang und es bildet sich nääben allnen anderen Ässfürz e Zuggetti-Community, wo drüber diskutiert wird, öbb me die grüene Dinger as Sunnegreeme chönnti an d Chürppse schlaargge.
Hed me sich äigedlig schon emool überläit, was bassiere würdi, wenn die ganzi Menschhäit würdi Zuggetti aapflanze. Oder anderscht gsäit: Döie mer doch deene, wo käi deere Gmües aapflanzen und numme dervoo ässe, es Chränzli winde. Döie nämmlig allsfott meh aapflanzen und allsfott weeniger Zuggetti ässe, versuuft d Menschhäit langsam aber sicher in de Zuggetti. No schlimmer. Die groosse grüene Bletter löie d Sunne nümm duuren und mir würde langsaam verfriere, verhungeren und verdurschte. Usser: Mer ässen alli wiider meh Zuggetti – vor allem die, wo sen aapflanzt häi.
Nääbenyyne: Chüngel sy intelligänter. Die frässe nämmlig käini Zuggetti. Wääge deene müessti niemer Zuggetti aapflanze. Also liebi Zuggetti-Buure: Überleggets öich guet, wenn der der neecher Früehlig s Brieffli mit de Zuggetti-Soomen in d Hand näämed.
