S Guete vorewägg: z Sissech wird an der Fasnecht no allewyyl drummled und pfiffe. Us Lieschtel isch jo die beunrueigendi Mäldig choo, ass d «Rotstab-Clique» s neecher Johr nümm well am Lieschtler-Fasnechtsumzuug mitlauffe. Was isch bassiert, ass deere fascht 80-jöhrige Clique der Umzuugs-Schnuuf uusgangen isch?
Jä, was isch mit der Fasnecht bassiert? E Däil Ölteri sääge: «S isch halt nümm wie albe.» Numme. Es isch nie wie albe. Und es isch gfeerlig, wenn me mäint, früener syg alles besser gsii. Chutzemischt. Nüt isch besser gsii – äifach anderscht. Au d Fasnecht.
D Zytte sy umme, wo d Fasnächtler mit der Konfetti-Kanoonen in d Bäizen yyneschiesse, d Chluuri am Umzuug Spröier ummeschiessen oder richtigi Müüs dur e Fläischwolf drääie, in Luftballöön füllen und de Zuschauer an d Chürpse bängle. Z gfeerlig hed me gsäit. Und: mit Fasnacht häig daas nüt z due. Scho doozmool hets nämmlig Lüt gee, wo genau gwüsst häi, was richtig und was faltsch isch.
Jetz goht wiider s glyych Gschrei loos. S geeb alsfott meh deere, wo sich an de Dambouren und Pfyyffer stööre. Wo de Cliquen am Umzuug Orange noocheschiessen oder bim Gässle s Höggli stelle. Chunnt e Cliquen in e Bäiz yyne, wärde sy vo stäärnehaagelvolle Hoosesäicher mit aagmoolte Gsichter uspfiffe. Ass daas nit unbedingt es Gaudi isch für die, wo drummeln und pfyyffe, cha me jo verstoo.
Aber. Sy mer doch eerlig. Drunken – und ich mäin nit Eptiger – isch an der Fasnecht scho immer worde. Früener wie hütte. Das isch glyych bliibe. Die, wo mit der Kanoonen in d Bäiz gschosse häi, sy sicher au nümm ganz nüechter gsii. Wohrschyynlig isch men aber sälbetsmool non e chlyy toleranter gsii.
Nummen. Äi Underschiid gits vellicht scho. Früener sys Fasnächtler gsii, wo für Ufreegig gsorggt häi. Aso settigi, won e Waage boue, in ere Guggen oder Clique mitgmacht häi oder as Schyssdräckzügli underwägs gsii sy. Sii häi müesen üebe, moole, schryynere. E Laarffen yyleggen oder es Goschtüüm nääie.
Das isch hütt däilwyys e chly anderscht. Hütt loot me sich oneline e souglatti Pappnaasen oder e Langhoorbeerügge lo choo. Oder me moolt sich d Chürpsen aa. Das längt as Verchläidig. Dehäi füllt me sich denn Lampe mit eme billige Fuusel. Me glüeit voor, wie me däm in deene Kräis säit. Deerewääg in Form stoot me denn, wenn me no chaa, am Umzuug am Stroosserand und pööblet d Fasnächtler aa. Halt en anderi Art kreativ z syy.
Au d Fasnecht isch es Apbiild vo der hüttige Zytt. Wo nit besser oder schlächter isch as «anno dazumaal». Äifach anderscht. Und wär wäiss: Vellicht chömme die Paralell-Fasnächtler, wo me sich hütt drüber ufreggt, gar nit wääge der Fasnecht. Fasnecht ischs halt äinewääg. Wenn vellicht au nümm vo öis Alte.
Wenn hütt z Oobe der Chluurireedner uf der Allmed säit: «Aadie Chluuri, aadie Fasnacht», häisst das nit, ass d Fasnacht sich verapschiidet. Si chunnt s neecher Johr wiider. Halt nümm wie früener – aber äinewääg.
