Wurschtsalaat

Mer müese reede. Jetz. Sofoort. Über e Wuschtsalaat oder daas, wo den alsfott meh in de Bäize vorgsetzt überchunnsch. Es kulinarischs Kulturguet goht vor d Hünd. Em Döifel zue. Es isch zum us der Hut fahren und äi Minute vor zwölfi. Chehre mer umm, bevors z spoot isch.

Es isch jo nit so schwer, e gattlige Wurschtsalaat z mache. Und: es git au none baar wenigi Bäizer, wo das chönne. Es foht mit der Wurscht aa. Die sett halt scho vo gueter Qualideet syy. Nit sonen yygschwäissti Lampiwurscht, wo zwaar billig isch, aber nüt mit emene richtige Chlöpfer z due hed. Die duet me, noodäm me se gschellt hed, der Lengi nooch halbieren und in schöön gattligi Schyybli schnyyde. Nit z dünn. Me darf jo rueig merke, was men isst.
Denn nimmt men e Däller. Nit sonen überdimensionierte, viereggige Glaasdäller oder sünscht en abschöiligs Designer-Unding. Äifach e Däller. Dä läit me mit gschnittnigem Salaat oder Salaatbletter uus. Aber doo häi die erschte Bäizer schon e Brobleem. Em Ali in der Chuchi hed niemer zäigt, wie me richtig Salaat rüschted. Und wil dä arm Kärli nääben allem andere nit au no Zytt hed, d Salaatbletter mindeschtens z viertle, chunnts der mängisch voor, de häigsch es halbs Dryybbettli uf em Däller.
Jetzt duesch e chlyyni Ziibele fyyn hacken und gisch se zue de gschnittene Würscht. Und jetz chunnt daas, wo d Verluederig aafoot. Statt d Wurscht und Ziibele mit der sälbergmachte Salaatsoosse z vermische, hüfele die kulinarische Dieffflieger die zwöi Sachen uf s Dryybhuusbettli. Denn leere si e kauffti Fertigsoosse drüber. Falsch, ganz falsch. D Wurscht und Ziibele mischt men imene Becki mit der Salaatsoosse. So isch alles schöön mit Soosse vermischt. Denn erscht richtet men aa.
S nechscht Debakel sy denn amme d Garniture. Wär in drei Döifels Naamen isch uf d Idee choo, as Garnitur Orange-, Melone- oder Mangoschnitz z serviere? Doomateschnitz gseie guet uus. Numme schmecke die im Winter halt eenter nach Arsch und Friedrich as nach Doomate. Zwoo, drüü Schyybe Salzgurken und Schnitz vomene gchochten Äi düies au. Ganz am Schluss cha me none chlyy früschghackte Beeterli drüberströie. Soo äifach isch daas.
En anders Kapitel isch der Wurschtsalaat garniert. Dört ghörte jon e baar früschi Salaat derzue und nit Büchsewaar. Mäischtens dümple nääbe de halbblutte Würscht süessi Mäis-Chörner, Raane-Würfeli, Sellerie- oder Rüeblisalaat us der Büchse. Es schmeckt halt überaall glyych, x wo den aanegoosch. As Chröönig chunnsch denn Broot über, wo der lieb lang Daag nöimen imene Blaschtigseckli ummegläägen isch. Daas maag jo rächt syy für Lüt ohni Zehn, aber nit für Gescht, wo no die zwöite Bysserli häi.
Soo. Das weers gsii. Nit so schwer, oder?