S verchunnt alsfott meh zumene beliebte Zyttverdryyb. Sy s Lotti* und der Böbbi* nöimen inere Bäiz gsii go ässe, döie sy, chuum sy si wiider dehäi, am Computer bi «TripAdvisor» e Beuurdäilig yygee.
Das döönt denn öbben esoo: «Bim Yygang hets no zwöi Konfetti vo der letschtjöhrige Faasnecht ghaa. Butze die denn nie? Nodäm as mer apgsässe syy, häi mer saage und schräibe föif Minute müese waarte, bis d Servierdüüse choo isch. Me mues sich emool vorstelle, die hed tätowierti Ärm ghaa. Ich wett nit wüsse, wo die sünscht no nöime Tatoos ghaa hed. E Spyys-Charte hets e käni ghaa. S Menü isch uf e Schiiferdaafele gschriibe gsii. Derbyy sett der Bäizer doch wüsse, ass s Lotti churzsichtig isch. S Fischfilet isch nit ganz duure gsii. Inne none chlyy glaasig. Der Bäizer sett sich e Byspiil an de Fischsteebli neh, wo s Lotti macht. Die sy allewyyl duuren und schöön droche. D Salzhärdöpfel häi no Biss ghaa. Öbbis wo mir zwöi überhaupt nit mööge, wil mer doch scho die dritte Zeehn häi. S glyych isch bim Salaat gsii. Der Rüebli- und Raanesalaat isch früsch und halt fascht nit zum byysse gsii. Die nuhmte lieber Doosewaar, die sy mir zwöi schlussemänd au besser gwöönt. Zum Fisch häi mer e Rooten us Sizilie gnoo. Billig und süess. Soo, wie halt Rootwyy mues syy. Uf em Fuess vom Glaas hets allerdings e Wasserdropfe ghaa. Die würde lieber Babyyrbächer neh, dernoo würd esoo öbbis nit bassiere. Der banierti Schwyyns-Schnitzel, wo d Frau gnoo hed – sii nimmt immer banierti Schnitzel – und d Portion Pommes Frites isch vill z chlyy gsii. Normalerwyys löie mer öis d Pommes, wo fürig sy, lo yypacke. Der neecher Daag häi mer esoo scho öbbis zum Zmidaag…»
Esoo gohts ändloos wytter. Nüt isch rächt. S Ässen isch z düür. D Servierdochter nit schnäll gnueg. Der Wirt offeriert käi Kaffi und uf der Toilette hets käini Erfrüschigsdüechli, wo me so gääbig cha lo mitlauffe.
Soo verchömme deere Beuurdäiligs-Portal alsfott meh zuenere Blattform, wo jeeden und jeedi chan e Sämpf verzapfe. Dört chönne sy – elektronisch – der Fruscht loos wäärde, wenn ihnen öbbis übers Nierli gchrochen oder geegen e Strich gangen isch. Überhaupt. Was befähiget deere kulinarischi Dieffflieger, wonene dehäi no s häiss Wasser aabrennt, sich zue öbbisem z üssere, wo sy käi Aanig häi dervoo? Jeede, won emool e Rüschtmässerli in der Hand ghaa hed, mäint efange, är chönni sich as Reschtaurant-Kritiker ufbluschtere. Ohni ass sys wüsse, mer näämen emool aa das syg esoo, wüsche sy emene Bäizer äin uus. Was jo schlussemänd gschäftsschädigend isch.
Ass dir mi rächt verstönded. Kritik isch wichtig und chan em Wirt hälfe, besser z wäärde. Aber bitte numme Kritik vo Lüt, wo au öbbis vom Chochen und Serviere verstönde. Die andere selle dehäi Fischsteebli ässe.
* D Nääme häi nüt z due mit Mensche, wos würklig git – nääme mer emool aa.
