Äär hed jo nit vill welle. Das häisst, für iin isch s schone rächte Schübel Gäld gsii. Wenn er aber eso ummegluegt hed, was doo vo de Banke so alles verdäilt wiird und woorden isch, hed s iin dunkt, äär chönn mit syym beschäidenen Aaliggen äigedlig käini Probleem haa.
Hed äär ämmel gmäint… Woner nämmlig äntlig d Hemmigen apgläit ghaa hed und im Bankgeböide schlussemänd bi der richtige Persoon glanded isch, hed s iin schone chlyy tschuudered ap soo vill Chroomstaal, Maarmoor und glänzige Schyybe. Vonere aamäächelige Jumpfere isch äär denn ines gattligs Büüro yynebätte worde, woner syys Aaligge hed döörffe voorbringe. E beschäidene Voorschuss bruuchti äär, hed er gmäint, zum s Huusdach, wo s albott yynedropft, z saniere.
Der nätti Bankaagstellti hed iim zuegloost und immer wiider verständnisvoll gnickt. Denn hed er gmäint, soo äifach syg daas denn nit, d Banke würde denn s Gäld nit äifach zum Fänschter uus schiesse.
Er hed öise braave Maa nonem Yykomme vo der Frau, der Groosmueter und der halbe Verwandtschaft uusgfrogt und d Bankbüechli vo de Chinder under d Lupe gnoo. Öise Bittsteller hed müese s letscht Detäil us syynere Vergangehäit uusbräite.
Öisem Maa isch s langsam gschmuech woorde, und äär isch sich voorchoo wie bimene Verhöör.
Er isch sich in der Zwüschezytt, bi der groosse Bank e chlyy Gäld überzchoo, schone chlyy gröijig gsii. Der nätti Bankfachmaa hed iin denn vertröschted, syys Aaligge wäärd vo höchschter Stell brüefft und äär wäärd gläägentlig Bschäid überchoo, öb men iim der gwünschti Voorschuss chönn gee.
Znacht im Bett hed sich öise Maa vo äiner Sytten uf die anderi gwälzt und sich immer wiider gfrogt, wiesoo bi iim, wo sich no nüt hed lo z Schulde choo, wo immer, wenn au wiiderwillig d Stüüre zaalt hed, no nie betriibe woorden isch und käini Schulde hed, wäge somene lächerlige Betraag sones Gschyyss gmacht wiird. Doo git s doch groossi Firmene, mit guet zaalte Verwaltigsrööt, wo joorelang Gäld zum Fänschter uuse gschosse häi und jetz nöimen ufem Trochene sitze. Und bi iim macht men e sones Bramborium.
Wie lenger ass äär überläit und ghirned hed, hed s iin dunkt, es syg allwääg besser, wenn er in Zuekumft e chlyy mee würd bschyssen und e groossi Rööre füere. Mit deene Gedanken isch er yygschloofe.
Schübel – Haufen
allwääg – wahrscheinlich
