Häit diir s au gmeerkt? Still und häimlig isch er verschwunde.
Nit gnueg, ass öis d Fraue zue «Sitzpinkler» und Chroomstaalfiengger – nach em Dusche – degradiert häi, näi, jetz häi sii öis au no inere hinterlischtigen Aktioon, so noodisnoo, der Strupfer ewägg gnoo.
Nit ass miir öis bim Butze füredrängt hätte, daas scho nit. Wenn aber halt emool – as Maa – so richtig hesch müesen in d Egge fääge, syy miir Manne baraat gsii und häi d Woonig uf Vordermaa brocht. Fraue, häit der uufpasst: Vordermaa, nit Vorderfrau.
Es hed under öis Mannen au so öppis wiene Butzkult gheerscht.
Es git nüt Schööners, ämmel fascht, wie wemmen als Maa mit em Strupfer in Liebi verschmilzt – e Gmäinschaft vo Chraft und Suuberkäit. Au technisch häi mer immer der Maa gstellt. Me läit also der Strupferstiil über e rächten Ooberschänkel, faltet der uusgrunge Butzlumpe, wo heerlig nach Butzmittel schmöckt, süüferlig über d Strupferbürschten und foot fascht scho schwääbend aa der Booden uufzie. Au wenn s nit immer ganz suuber isch, so gseet s ämmel mäijeschteetisch uus.
In Internetkaffi döie miir denn öisi Erfaarige wältwyt uusduusche. Zum Byspiil, mit waas fürere Borschtedicki am Strupfer fuerwäärched e Mongoolemaa in syynere Jurten umme? Mit weelem Strupfer handiert e nepalesische Zenmönch? Mit waas fäggt der egyptisch Cheopspyramidewächter em Tut-Ench-Amun syy Graabchammere, oder mit waas füreme Hoochleischtigs-Universal-Natuurhoorstrupfer ziet der Bäizer der Booden uuf, wenn der Durnveräin Sissech wiider emool imene häimtückischen Überfall s Pöbb häimgsuecht hed?
Und jetz, wo miir scho gmäint häi, mit de «Tupperware»-Partys häige mer s Gröbscht glücklig überstande, chömmen is d Fraue mit so neumöödischem Züüg: Kunschtfasere-Häppenings, Butzen ooni Butzmittel, für jeedi Dräcksorten öppe 14 verschiideni Butzlümpe. Lümpen oder eben eender High-Tech-Düecher in alle möögligen und unmööglige Faarpen, ass äim s butztechnisch gschuelten Aug wee duet.
Wäär söll denn doo no druus choo? Wo blybt doo d Butzmoraal?
Es git scho Manne, wo völlig verunsichered irgend nöimen in der Geegend umme pflättere, resigniert mit pflätschnasse Boodelümpe handieren und demotiviert und apgstumpft, schlaff und chraftloos d Chuchiblättli drakdiere. Es druurigs Bild.
Also Fraue, gääbed öis der Strupfer wiider zrugg und miir versprächen öich au, jeedes Mool uf em Hüüsli apzhocke.
Versproche?!
noodisnoo – nach und nach
fuerwäärche – ungestüm hantieren
