Äigedlig ghöört der Äänis in d Äänisbröötli.
Guet. Me cha no Äänischnaps dervoo mache. Das isch jo au nit esoo dernääbe.
Aber wie gsäit. Es ghööre ganzi Äänissoomen in d Äänisbröötli und nit so apsunderligs Züüg wie Äänisööl oder Änisbulver. Joo guet, es chaa halt schon emool bassiere, as dr son en Äänissoome zwüschen em Gebiss stecke blyybt. Aber soo hesch dr ganz Daag e früschen Ootem und de bruuchsch käi Chätschgummi oder gaar e Schygg.
D Muetter hed amme die dröchneten Äänissoomen imene Naasduech uf e warme Chacheloofe gläit. Denn hed si s Naasduech yygschlaagen und d Soome fescht zwüsche de Häänd verriibe. Soo hed si noochhäär besser chönne die fyyne Höörli druuslääse.
Also dänked draa. Näämed richtigen Äänissoome für Euchi Äänisbröttli, as die Gutzi au e Gattig mache.
Chätschgummi = Kaugummi
Schygg = Kautabak
