Wenn miir ammen in der Jugi häi müesse d Chlätterstangen uufechnoorze, isch der Chaschper – joo, dä hed glyych ghäisse wie dä vo Gälterchinde – fuchsdöifelswild worde, will er nie richtig uufe hed möögen und miir iin wääge däm uusglachet häi. Denn hed är in der Durnhallen afoo ummedöipele, s Bändeli in en Egge gschossen und e Muschgrind gmacht. Noonem Durne, wenn iin s Mutti isch cho aphoole, hed er afoo brieggen und iire grätscht, as alli ganz böös mit iim syyge.
Daas isch miir wiider in Sinn choo, won iich am Mittwuche der Chaschper – joo, dä uus Gälterchinde – noo de Bundesrootswaale ghört haa schwätze. Öbs ächt am Naame lyt?
briegge = weinen
rätsche = ausplaudern
2 Kommentare
Guete Morge, Herr Oberer
I ha gar nit gwüsst, dass me bi öis au „briegge“ sait. Ha imme gmaint, das chem us irgend emen andere Kanton. Us mynere früehe Jugend, wo scho einigi Zyt zrugg lyt, kenn i numme s Wort „gryne“.
I wünsch Ihne e frohs Wienechtsfescht und alles Gueti im nöie Johr und hoff uff no vill interessanti Kolumne in dr baz (obwohl i noni weiss, öb i dere Zytig no wott d Tröii halte).
Mit fründlige Griess
Rosmarie Dettwiler
Liebe Frau Dettwiler
Härzlige Dank für öichi Noochricht
Miir häi halt e ryyche Dialäkt
Es git nämmlig für s Dütsche Wort «weinen» siibe verschiideni Baaselbieter-Uusdrück (blääre, briegge, gränne, gryyne, hüüle, pflänne und zänne
– ämmel die won iich kenn), wo alli e chlyy öbius anders mäine
Liebi Grüess
Heiner Onerer
wo alles e chlyy öbis anders mäine