Jetz rollt sy wiider aa – d Wienechtsgutzi-Lawyyne. Es wird miir scho jetz gschmuech, wenn iich draadänk, waas für uusgfalleni Gutzi-Kreazioone hüür wiider uf mii zue chömme. Joo iich wäiss, es mäines alli numme guet. Soo wärde miir die neechschte Wuche die verrücktischte Gutzi-Nöierfiindige in gattlige Zelofaan-Seckli aabotte: Orangehöckli mit Hagelzucker vom Himalaya, irakischi Fyyge-Dattle-Schüümli, Kumquatgipfeli oder Seegurkeringli. Doo hets myy Mueter äifacher ghaa. Sii hed albe Bruunsli, Mäiländerli oder Äänisbröötli gmacht. Ihres gröscht Probleem isch nit gsii, wohär sii orientalische Hagelzucker überchunnt. Näi, ihre gröscht Chumber isch gsii, as d Füessli vo den Äänisbröötli graad wärde.
gschmuech = vor Hunger schwach werden
Chumber = Sorge
