S Huldi, das isch d Frau vom Noldi vom Chlöpfgatterhoof, hed numme der Chopf gschüttlet und gsäit: «Jä nundfanne, das isch doch nüt Nöis, as der Amerikanisch Breesi, der Dütsche Breesene s Deelifoon aploost, numme as er noochaane cha ummerätsche, bii was fürmene Gwafföör sii gsii isch.» Das gits bii iine z Hinderfultige scho lang. D Büürene vom Noochbershoof hed ämmel immer sofoort gwüsst, wenn der Noldi e Chue, es Ross oder e nöie Mischtzettler gchauft hed. Non am glyychen Oobe hed Noochbüürene die Nöigchäite bii der Cheesi allne brüewaarm verzellt. Über alles und jeede hed sii s Muul verrisse. Der äinzig Underschiid zum Amerikanische Breesi isch, as d Rätschbääsene für das käis Deelifoon brucht hed.
Rätschbääsi = Klatschweib
Büürene = Bäuerin
