Soo, hed der Schmutzli gsäit: «Hüür isch s letscht Mool gsii, as ich hinderem Santichlaus dryygseckled bii.» Und är heebi gnueg dervoo, as er allwyyl der Böölimaa müesi spiile und der Santichlaus der Siibesiech markieri. Das geechti jo no alles. Aber wo der Chlaus underäinisch aagfange häigi vo Wytterbildig z reede, häigs ihm der Deckel ändgültig glüpft. Öbbis vo Vordrääg vo Chinderpsychologe, Spiilgruppeläiterinne und Chindergärtnerinne häig der Santichlaus gschwaafled. Das sygi wichtig, as d Chinder nit es falsches Bild vom Santichlaus übercheeme und nit gaar emänd no Angscht hätte. Er geengi jetz zrugg in Schwarzwald, hed der Schmutzli brummled. Dört buechi er s düürschte Wellnesshotel und liess sichs lo wohl syy – ohni Spiilgruppeläiterinne.
Böölimaa = Drohfigur, um unartige Kinder zu erschrecken
schwaafle = dumm daherreden
